इलाम । जिल्ला प्रशासन कार्यालय इलामले अनुमतिबिना ग्यास बेच्ने दुईवटा पसललाई बिक्री वितरणमा रोक लगाएको छ । दुवै पसलका सञ्चालकलाई तीन दिनभित्र प्रशासन कार्यालयमा हाजिर हुन भनिएको छ ।
प्रशासनले गरेको अनुगमनका क्रममा बिना अनुमति खाना पकाउने ग्यास बिक्री गरिरहेका इलाम सदरमुकामस्थित जिरो किलोमिटर र कुलधारामा रहेका दुई पसललाई ग्यास बेच्न नपाउनेगरी ग्यास नै शिल गरिदिएको हो ।
सहायक प्रमुख जिल्ला अधिकारी ध्रुव कोइरालाले कुुलधाराको पसलमा ५१ वटा भरिएको र दुई सय दुई खाली सिलिन्डर ‘सिल’ गरिएको जानकारी दिए । कोइरालाका अनुसार जिरो किलोमिटरको अर्को पसलमा पनि ९८ वटा भरिएको र ६ वटा खाली सिलिन्डरमा शिल गरिएको छ ।
अनुगमनका क्रममा कतिपय सिलिन्डर म्याद गुज्रिएका पाइएको थियो । यस्ता १३ सिलिन्डर अनुगमन टोलीले जफत गरेको छ । म्याद नलेखिएका खानेपानीका ६ वटा जार पनि बरामद गरिएको प्रशासनले जनाएको छ ।
फाइल तस्बिर : इलाम बजारमा पसल अनुमगन गर्दै जिल्ला प्रशासनको टोली
