इलाम । माईखोलाको बाढीमा फसेका २ जनाका उद्धार गरिएको छ । माइजोगमाई गाँउपालिका–५ नाम्सालिङका ६६ बर्षिय लोक बहादुर नेम्वाङ र ३० बर्षिय जोजो लिम्बु लाई बाढीमा फसेको अवस्थामा उद्धार गरिएको हो । हिजो साँझमा नाम्सालिङ ५ मा अवस्थित माईखोला किनारामा खेतिपाती, गाईगोठ गरी फर्किने क्रममा एक्कासी माईखोलाको पानीको वहाव बढि बाढीले जमिन कटान गर्दा दुबै तिरको बीच जमिनमा उनीहरु फसेका थिए ।

जिल्ला प्रहरी कार्यालय इलामका इन्सपेक्टर नबिन राईको कमाण्डमा खटिएको प्रहरी बल, सशस्त्र प्रहरी, नेपाली सेना र स्थानीय ब्यक्तिहरुको सामुहिक प्रयासबाट फसेका उक्त २ ब्यक्तिहरुलाई राति ९:५५ बजे बजे सकुशल उद्धार गरी निजहरुलाई आफन्तको जिम्मा लगाई पठाईएको डिएसपी लालध्वज सुबेदीले जानकारी दिए ।