फिक्कल । इलामको सुर्योदय नगरपालिका भित्र विभिन्न सरकारी तथा सेवा मुलक संस्थाको भवन निर्माणको लागि जग्गा दान गर्ने दातालाई सम्मान गरिएको छ ।
पुर्व प्रधानमन्त्री तथा ईलाम प्रतिनिधि क्षेत्र नं १ माननीय सांसद झलनाथ खनालले जग्गादातालाई सम्मान पत्र प्रदान गरे ।
सूर्योदय नगरपालिकाका उप–प्रमुख दुर्गादेवि भट्टराईको अध्यक्षतामा भएको कार्यक्रममा वडा कार्यलय ,स्वास्थ्य चौकी लगायतका भवनहरु निर्माणका लागि निशुल्क जग्गा दान गर्नुहुने ३९ जना दातालाई सम्मान गरिएको सविना चौलागाईले जानकारी दिइन् ।
सम्मान कार्यक्रममा बोल्दै प्रमुख अतिथि तथा पूर्व प्रधानमन्त्री झलनाथ खनालले स्थानीय सरकारलाई स्थापित र बलियो बनाउन जग्गा दान गर्ने सम्पूर्णको योगदान स्मरणिय हुने बताए ।
तीनै तहको सरकार गठन भएपछि विकासको लहर चलेकाले सम्पूर्ण जनप्रतिनिधिहरु र जनता एक भएर लाग्नुपर्ने खनालको भनाइ छ ।
जग्गा दाताको तर्फबाट सम्मान कार्यक्रममा जग्गादाताको तर्फबाट लोकनाथ खड्काले जग्गा दान गर्ने व्यक्तिको योगदानलाई सम्झेर सम्मान गरेकोमा धन्यवाद दिएका थिए ।
कार्यक्रममा बोल्दै सूर्योदय नगरपालिकाकी उप–प्रमुख दुर्गादेवी भट्टराईले प्राप्त भएको जग्गामा सेवामुलक कार्यालय र अन्य संरचना निर्माण गरिने भएकाले नगरपालिकाको विकासमा महत्वपूर्ण योगदान रहने बताइन् ।
