नेकपा एमाले माई नगर कमिटीले देउसी भैलो तथा विभिन्न चाड पर्बको शुभकामना आदन प्रदान तथा जागरण सम्मान कार्यक्रम एवम माई नगर कमिटी कार्यालय निर्माण अभियानको आज समापन गरेको छ । समापन कार्यक्रमका अबसरमा ज्येष्ठ नागरिक सम्मान, जग्गादाता सम्मान, खेलाडी सम्मान सहित शुभकामना आदन–प्रदान गरिएको हो ।
गत कार्तिक २६ गते देखि माई नगरका वडा वडामा देउसी कार्यक्रम सहित ज्येष्ठ सम्मान कार्यक्रम सन्चालन गरिएको थियो । सम्मान कार्यक्रममा माई–४ वाहेक माई नगरका अन्य ९ वटा वडामा ६ सय ६३ जना र शनिवार माई–४ भित्र र अन्य छुट जेष्ठ नागरिक सहित दुई सय जना गरी ८ सय ६३ जना ज्येष्ठलाई ढाँका टोपी र गाम्चा द्वारा सम्मान गरिएको नगर अध्यक्ष खम्ब सिं लिम्बुले जानकारी दिए ।
कार्यक्रममा नेकपा एमालेको भवन निर्माणका लागि १२–१२ आना जग्गादान गर्नुहुने माई–२ मस्त निवासी अर्जुन र कुन्ता पाण्डे तथा चन्द्रलाल र धनमाया गिरीलाई सम्मान गरिएको थियो । त्यस्तै अर्जुनधारामा सम्पन्न कराते प्रतियोगितामा उत्कृष्ठ हुने खेलाडीलाई समेत सम्मान गरिएको थियो ।
नेकपा एमाले माई ४ वडा कमिटी अध्यक्ष जीत बहादुर केरुङको अध्यक्षता, पुर्व प्रदेश साँसद काजीमान कागतेको प्रमुख आतिथ्यता, माई सचिव हेमबहादुर मगरको सन्चालन र सचिवालय सदस्य धन बहादुर आङदम्बेको स्वागतमा सम्पन्न कार्यक्रममा एमाले जिल्ला कमिटी उपसचिव बिष्णुमाया आचार्य, माई नगर कमिटी अध्यक्ष खम्बा सिंह लिम्बू, ज्येष्ठ नागरिक सोमनाथ ढकाल लगायतले शुभकामना मन्तब्य राखेका थिए ।
कार्यक्रममा एमाले जिल्ला कमिटी सदस्यहरु दिपक कुमार थेवे, मुखराज आङदम्बे, कुमारी रैका, शिब भण्डारी, मेघनाथ गिरी, राजकुमार गड्तौला लगायतको सहभागिता रहेको थियो ।
