इलाम (समाल्बुङ) नो टु ड्रग्स’ भन्ने सन्देश दिन गोरख टोल विकास संस्था समालबुङ, इलामले आयोजना गरेको प्रथम गोरख भेट्रान्स कप फुटबलको उपाधि आयोजकले जितेको छ । सूर्योदय नगरपालिका ५ समालबुङस्थित गोरखको सामसुङ मेमोरियल खेलमैदानमा शनिबार भएको फाइनल खेलमा एमसीसी फिक्कल भेट्रानलाई ३(० गोलअन्तरले पराजित गर्दै आयोजक गोरख भेद्रान क्लबले उपाधि रक्षा गरेको हो ।
आयोजकका लागि दिपेन राईले २ गोल र सुरजकुमार श्रेष्ठले १ गोल गरे । उद्घाटन खेलमा ह्याट्रिक पूरा गरेका दिपेन राई सर्वाधिक गोलकर्ता पनि बने । फिक्कले अनेक प्रयास गर्दा पनि गोल फर्काउन नसक्दा उपविजेतामा समेटियो । आयोजकले नगद ४० हजार र ट्रफी पाउँदा उपविजेता फिक्कलले नगद २० हजार र ट्रफीमा चित्त बुझायो ।
प्रतियोगिताको उत्कृष्ट खेलाडी आयोजकका गोलरक्षक रामनारायण चौधरी भए । यसअघि भएको पहिलो सेमिफाइनल खेलमा आयोजकले दमक लखनपुर भेट्रान्स फुटबल क्लब झापालाई २(० गोलमा पराजित गर्दै फाइनल यात्रा तय गरेको थियो । आयोजकका लागि कप्तान विकास बम्जनले दुवै गोल गरेका थिए । यस्तै, अन्तिम सेमिफाइनल खेलमा फिक्कलले इलाम भेट्रान क्लबलाई १(० गोलको कठिन जित निकाल्दै फाइनलमा प्रवेश गरेको थियो ।
उसका लागि धिरज ठकुरीले गरेको गोल नै निर्णायक बनेको थियो । दुई दिनसम्म चलेको प्रतियोगितामा झापा, इलाम, पाँचथर र भारतको एक टिम गरी आठ टिमको सहभागिता रहेको थियो । प्रतियोगिताको समापनमा प्रमुख आतिथि संविधानसभा सदस्य टिकाराम लेप्चाको, बिषेश अतिथि प्रदेश फुटबल संघका महासचिव भगिरथ आले, सूर्योदय नगरपालिका ६ का अध्यक्ष सिव बस्नेत सुर्योदय नगर खेलकुद समितिका संयोजक शौरभ आचार्यले खेलकुदको विकास गर्नका लागि सबै एकजुट हुनुपर्नेमा जोड दिएका थिए ।
