नयाँबजार । स्थानीय सरकार गठन भएको ३ बर्षपछि इलामको माईजोगमाई गाउँपालिकाले सवै वडामा अनलाइन प्रणालीबाट पञ्जिकरण एवम कर संकलन सेवा प्रारम्भ गरेको छ । ६ महिना अघि ६ वटै वडामा इन्टरनेट सुविधा विस्तार भएपनि प्राविधिक समस्याका कारण सेवा प्रवाहमा कठिनाई भएको थियो । गाउँपालिकाले चालु आर्थिक बर्षबाट सेवा प्रवाह चुस्त दुरुस्त बनाउने निर्णयसँगै अनलाइनको माध्यमबाट कर संकलन तथा अन्य सेवा प्रवाह सुचारु गरिएको कम्प्युटर अपरेटर अशोक लिम्बुले जानकारी दिए ।
वडा नं ४ बाट सेवा सुचारु गरिएको छ । गाउँपालिकाको २ नं वडा कार्यालय बाहेक अन्यमा २ बर्ष अघि नै इन्टरनेट विस्तार भएको गाउँपालिका अध्यक्षका स्वकिय सचिव सञ्जिव थामीले जानकारी दिए । भारतसंग सिमा जोडिएको उत्तरी स्थानीय तहले असार २० र २१ गते वडा सचिव, कार्यालय सहयोगी एवम प्राविधिकहरुलाई अनलाइन पञ्जिकरण सम्बन्धी तालिमको आयोजना गरेको थियो ।
अब गाउँपालिकाले सफ्टवेयरको माध्यमबाट जनताहरुमा सेवा प्रवाह गर्ने छ । अनलाइन प्रणाली सुचारु भएसंगै सेवा प्रवाहमा सहजता हुने गाउँपालिका अध्यक्ष जीतबहादुर राईले बताए ।
