इलाम । माध्यमिक शिक्षा परीक्षा (एसईई) –२०८२ मा लिम्बु विद्यार्थीमध्ये सर्वोत्कृष्ट अंक प्राप्त गर्ने इलामकी चेसुङ लिम्बुलाई किरात याक्थुङ चुम्लुङ केन्द्रीय समितिले नगद पुरस्कारसहित सम्मान गरेको छ।
किरात याक्थुङ चुम्लुङको ३८औँ स्थापना दिवसका अवसरमा आज ललितपुरमा आयोजित चुम्लुङ दिवस मूल समारोहमा चेसुङलाई नगद रु। १० हजार र प्रमाणपत्रसहित सम्मान गरिएको हो। कार्यक्रमकी प्रमुख अतिथि संगीत तथा नाट्यकला प्रज्ञा प्रतिष्ठानकी उपकुलपति झुमा लिम्बुले चेसुङलाई पुरस्कार तथा प्रमाणपत्र प्रदान गरेकी थिइन् ।
चेसुङले इलाम नगरपालिका–५ स्थित अमर माध्यमिक विद्यालयबाट एसईई–२०८२ उत्तीर्ण गरेकी हुन्। किरात याक्थुङ चुम्लुङले प्रत्येक वर्ष शैक्षिक क्षेत्रमा उत्कृष्ट उपलब्धि हासिल गर्ने लिम्बु विद्यार्थीलाई प्रोत्साहनस्वरूप सम्मान तथा पुरस्कार प्रदान गर्दै आएको जनाएको छ।
