इलाम । बंगलादेशमा जारी साफ यू–२० महिला च्याम्पियनसिपमा नेपालले ‘गर या मर’ को खेलमा सोमबार आयोजक राष्ट्रको समाना गर्दैछ । यो खेलले प्रतियोगिताको विजेता को हुने भनेर फैसला गर्नेछ । ढाकास्थित बसुन्धरा स्पोर्टस् ग्राउन्डमा खेल साँज ६:४५ बजेदेखि सुरु हुनेछ । आज नै भुटान र श्रीलङ्का पनि आमनेसामने हुनेछन् । दुई टोलीबिचको खेल २:४५ बजे खेलिनेछ ।

यसपटक प्रतियोगिता ४ सहभागी राष्ट्रबिच डबल राउन्ड रोबिन आधारमा खेलाइएको हो । सबै खेल सकिएपछि शीर्ष स्थानमा रहने टोली च्याम्पियन बन्ने छ । नेपाल ५ खेलबाट १२ अङ्कसहित तालिकामा दोस्रो स्थानमा रहेको छ । आयोजक बंगलादेश ५ खेलबाट १५ अङ्क बटुल्दै शीर्ष स्थानमा छ । भुटान ३ अङ्कसहित तेस्रो र अङ्कविहीन श्रीलङ्का पुछारमा रहेको छ ।

गोल अन्तरमा आधारमा भने नेपाल बंगलादेशभन्दा अगाडि छ। ५ खेलमा ३० गोल गर्दै ४ गोल खाएको नेपालको गोलअन्तर २६ रहेको छ । उता, बंगलादेशको गोलअन्तर २० रहेको छ । त्यसैले, उपाधि जित्नका लागि नेपाललाई आजको खेलमा जीत हात पार्न आवश्यक छ ।

नेपाल प्रतियोगितामा बंगलादेशसँग दोस्रोपटक आमनेसामने हुन लागेको हो । नेपाल आफ्नो दोस्रो खेलमा बंगलादेशसँग प्रतिस्पर्धात्मक खेलमा २–३ गोलले स्तब्ध बन्न पुगेको थियो ।  पछिल्लो खेलमा भने नेपालले भुटानमाथि गोल वर्षा गरेको थियो । नेपालले ८-० गोलले जित हात पारेको थियो । यसअघि नेपालले पहिलो खेलमा भुटानलाई ६-१ गोलअन्तरले हराएको थियो । नेपालले श्रीलङ्काविरुद्ध पनि शानदार जित हात पारेको थियो । बिहीबार सम्पन्न खेलमा नेपाल ७–० ले विजयी बन्यो । गत मंगलबार भएको खेलमा नेपाल समान ७–० को विशाल अन्तरले विजयी भएको थियो ।

नेपालका लागि पूर्णिमा राईले सर्वाधिक १० गोल गरेकी छन् । उनी प्रतियोगिताको पनि सर्वाधिक गोलकर्ता हुन् । त्यस्तै मिना देउवा यो सूचीमा दोस्रो स्थानमा छिन् । उनले ७ गोल गर्न सफल भएकी छन् । कुसुम खतिवडा र समीक्षा मगरले ३/३ गोल गरेका छन् । यसैगरी सेनु परियार र सरिता कुमारीले २/२ गोल तथा अनिषा राई र बिर्सना चौधरीले १/१ गोल गरेका छन् ।