पाँचथर : मेची राजमार्गस्थित हेंवा खोलामा निर्माणाधीन बेलिब्रिज खसेको छ । जोडेर खोला वारिदेखि पारी पुर्याउने क्रममा पुल खसेको हो । पुल खस्दा एक जना मजदुरको निधन भएको छ भने तीन जना घाइते भएका छन् ।
पुल जोड्न खटिएका मजदुरको नाम र ठेगाना खुलाइएको छैन । पुल खसेर मानिस घाइते भएको खबर आएपछि आफू पनि घटनास्थलमा जाँदै गरेको जिल्ला प्रहरी कार्यालय पाँचथरका प्रहरी नायब उपरीक्षक कौशलकुमार बुढाथोकीले जानकारी दिए ।
घाइतेलाई उद्धार गरी पाँचथर अस्पताल ल्याउने तयारी भइरहेको छ । पहिलो पटक २०८० साल असार २ गते आएको बाढीले यहाँ लगाइएको पक्की पुल बगाएपछि बेलिब्रिज बनाइएको थियो । पुनस् २०८१ असोज १२ गते सो बेलिब्रिज बगेपछि पुनः मोडुलर (बेलिब्रिज) बनाइँदै थियो ।
पुल के कारणले र कसरी खस्यो भन्ने विषय पुष्टि भएको छैन । मेची राजमार्ग अन्तर्गत पाँचथरको फिदिम र हिलिहाङलाई सिमाना छुटाउने हेवा खोलामा पुल र बेलिब्रिज बगेपछि डाइभर्सन गरेर गाडी वारपार गरिँदै छ । निर्माणाधीन बेलिब्रिज खसेपछि अब पाँचथर र ताप्लेजुङ सवारी आउजाउ प्रभावित हुने पक्का भएको छ ।
