फिक्कल । आर्थिक बर्ष २०७९/८० को स्थानीय तह संस्थागत क्षमता स्वमुल्यांकनमा इलाम नगरपालिका पहिलो भएको छ । संघीय मामिला तथा सामान्य प्रशासन मन्त्रालयले वेवसाइटमा सार्वजनिक गरेको विवरण अनुसार कुल १ पुर्णाङ्कमा ८९.५० अंक ल्याउँदै जिल्लाको प्रथम भएको हो । ८८.२५ अंकका साथ सूर्योदय नगरपालिका दोश्रो भएको छ । ७८.२५ अंकका साथ सन्दकपुर गाउँपालिका तेश्रो भएको छ ।
७१.७५ अंकको साथ चुलाचुली गाउँपालिका र फाकफोकथुम गाउँपालिका चौथो भएका छन् । ६८.५० अंकको साथ रोङ गाउँपालिका छैटौ भएको छ । ६७.२५ अंकको साथ देउमाई नगरपालिका सातौ भएको छ । ६४ अंकको साथ माईजोगमाई गाउँपालिका र माङसेबुङ गाउँपालिका आठौ भएका छन् । ६१ अंकका साथ माई नगरपालिका अन्तिम स्थानमा रहयो ।
मन्त्रालयले स्थानीय तहको कार्यप्रक्रिया र उपलब्धिहरुको बारेमा लेखाजोखा गर्न, विकास तथा सुशासनमा रहेका कमीकमजोरीहरुको जानकारी लिन, आवधिक समिक्षाका लागि आधार प्राप्त गर्न स्वमुल्यांकन गराउँदै आएको छ । स्थानीय तह संस्थागत क्षमता स्वमुल्यांकन कार्यविधि, २०७७ ले स्थानीय तहको संस्थागत क्षमता स्वमुल्यांकनका लागि विभिन्न विषयक्षेत्रहरु निर्धारण गरेको छ ।
संघीय मामिला तथा सामान्य प्रशासन मन्त्रालयले ४० प्रतशितभन्दा कम अंक ल्याउनेलाई नाजुक, ४० देखि ६० प्रतशित अंक ल्याउनेलाई कमजोर, ६० देखि ८० प्रतशित अंक ल्याउनेलाई राम्रो, ८० प्रतिशमाथि अंक ल्याउनेलाई उत्कृष्ठ स्थानीय तहका रुपमा वर्गीकरण गर्ने गरेको छ ।
