इलाम । ट्रयाक खनिएको ७० वर्षपछि इलामको फिक्कल–नयाँबजार सडक कालोपत्रेको काम अन्तिम चरणमा पुगेको छ । प्रदेश सभा सदस्य तथा पूर्व पर्यटन मन्त्री खिनु लङ्वा लिम्बुको प्रस्तावमा प्रदेश सरकारबाट बहुवर्षे ठेक्का मार्फत निर्माण भएको सडक भारतको सीमा क्षेत्रसम्म जोडिनेछ । सडक कालोपत्रेको काम अन्तिम चरणमा पुगेपछि इलामको उत्तरी ३ स्थानीय तहका बासिन्दा खुशि भएका छन् ।
फिक्कल नयाँबजार सडक खण्डको १६ किलोमिटर सडक अहिले कालोपत्रे भइसकेको निर्माण व्यवसायी डिल्लि खनालले बताए । २० किलोमिटर २ सय मिटर सडक कालोपत्रे गर्ने ठेक्का संझौता अनुसार ७ सय २० मिटर आरसिसि ढलान पनि सकिएको हो । गर्नुपर्ने ७ सय मिटर गर्नुपर्ने भएपनि २० मिटर बढी भएको हो । साढे १० किलोमिटर कालोपत्रे भएको छ । बरबोटेबाट पान्दाम खोलासम्म सडक कालोपत्रे भएको छ । नयाँबजारबाट गुप्तिसम्म सडक कालोपत्रे भइसकेको छ । गुप्ति बजारबाट जोगमाई खोलासम्म कालोपत्रेको पहिलो कोट सम्पन्न भएको छ । दोस्रो कोट गर्ने काम बाँकी रहेको छ ।
आयोजनाको जोगमाई खोलाबाट पान्दाम खोलासम्म चार किलोमिटर कालोपत्रेको काम बाँकी रहेको निर्माण व्यवसायी डिल्लि खनालले बताए । यो खण्डमा पनि सब बसे लगाउने काम गरिएको र भुक्तानको प्रतिवद्धता भएमा चैत्रभित्रमा सबै काम सम्पन्न हुने उनले बताए । सडक आयोजनाको स्टकचरको काम पुष भित्रमा सम्पन्न हुनेछ ।
सडकको भुक्तानीको अवस्था अहिलेसम्म नियमित भइरहेको छ । जसका कारण सडक निर्माणमा नियमित भएको हो । सडकको प्रदेश सासंद खिनु लङ्वा लिम्बुको नेतृत्वमा सडकको अनुगमन गरिएको छ । अनुगमनमा पूर्वाधार विकास कार्यालय झापाका इञ्जिनियर सुरेन्द्र साहा, निर्माण व्यवसायी डिल्लि खनाल लगायतको टोलीले अनुगमन गरेको थियो ।
सडक कालोपत्रे भएपछि आन्तरिक तथा बाह्य पर्यटक बढ्ने विश्वास गरिएको छ । सडक कालोपत्रेले तीनवटा स्थानीय तहका बासिन्दा प्रत्यक्ष लाभान्वित हुने प्रदेश सासंद खिनु लङ्वा लिम्बुले बताइन् । ५३ करोड रुपैयाँको लगानीमा कालोपत्रेको काम थालिएको फिक्कल–नयाँबजार–जौबारी सडकको वित्तिय प्रगति ७० प्रतिशत रहेको छ ।
सडक कालोपत्रेपछि सूर्योदय नगरपालिका, माइजोगमाइ र सन्दकपुर गाउँपालिकाबासीलाई प्रत्यक्ष फाइदा पुग्नेछ । पर्यटकको आवतजावत हुने र देशकै सबैभन्दा ठूलो आलु विकास केन्द्र जौवारी हुँदै भारत जोड्ने सडकले उत्तरी इलामका बासिन्दालाई ठुलो सहयोग पुग्ने माईजोगमाई गाउँपालिका पूर्व अध्यक्ष जीत बहादूर राईले बताए ।
२०१० सालमा तत्कालिन बडाहाकिम सन्तवीर लामाको नेतृत्वमा सडकको ट्रयाक खोलिएको थियो । २०७६ मंसिरमा निर्माण सम्झौता भएको सडक झापामा रहेको प्रदेश सरकारको पूर्वाधार विकास कार्यालयमार्फत कार्यान्वय हुँदै आएको छ ।
सडक कालोपत्रे भएपछि भारतसँग सीमा जोडिने भएकाले सीमा क्षेत्रका नेपाली नागरिकको पनि नेपाली बजारसम्म पहुँच पुग्नेछ । प्रत्यक्ष रूपमा भारतसँग जोडिने यो सडकका कारण भारतीय पर्यटक बढ्ने विश्वास गरिएको छ । कोशी प्रदेश सरकारले गरेको कालोपत्रको कामले गति लिएपछि इलामको उत्तरपूर्वी क्षेत्रका बासिन्दामा खुसियाली छाएको छ । सडक कालोपत्रे भएपछि बाह्रै महिना यातायात सुचारु हुने भएपछि यहाँ उत्पादित कृषिजन्य उत्पादनलाई भारतको बजारसम्म पुर्याउन सहज हुनेछ ।
