धुलाबारी । बरिष्ठ फुटबल प्रशिक्षक भगिरथ आले ‘मामा’ झापा जिल्ला फुटबल संघको दोश्रो पटक अध्यक्ष चुनिएका छन ।
शनिबार धुलाबारीमा सम्पन्न वार्षिक साधारणसभा तथा अधिवेशनबाट मामा दोस्रो पटक संघको अध्यक्षमा चुनिएका हुन् । मामा फुटबल संघको संस्थापक अध्यक्ष हुन् । २०५२ सालमा फुटबल संघ गठन हुँदा मामाको नेतृत्वमा कार्यसमिति चयन भएको थियो ।
यसअघि मामा संघको बरिष्ठ उपाध्यक्ष थिए । निवर्तमान अध्यक्ष जलकुमार गुरुङ सदस्यमा रहेका छन् भने भेलाले नै महासचिवमा शेरबहादुर बस्नेत र नरेन्द्रमणि लिम्बूलाई कोषाध्यक्षमा मनोनित गरेको छ ।
त्यस्तै एन्फाका केन्द्रीय सदस्य पंकजविक्रम नेम्वाङ, कर्णबहादुर थापामगर, प्रदीप राई, अमिरकुमार श्रेष्ठ, टिकाराम प्रसाई, पूर्णमाया लिम्बू, केदार चौधरी र बुद्धराज लिम्बूलाई अधिवेशनले संघको सदस्यमा सर्वसम्मत चयन गरेको छ ।
जलकुमार गुरुङको अध्यक्षतामा भएको उद्घाटन कार्यक्रममा फबलप्रेमी तथा उद्योगी होम पाण्डेले प्रमुख अतिथिको मन्तव्य राख्दै मनमुटाव छाडेर सिंगो फबलको विकासमा लाग्न अनुरोध गरेका थिए । उनले फबलकै कारण झापा जिल्लाको शीर उँचो भएको भन्दै गर्व गर्नका लागि फबलको विकास अनिवार्य भएको बताए ।
त्यस्तै, झापा ११ गोल्डकपका संयोजक महेन्द्र गिरीले फुटबल प्रति क्रेज बढ्दै गएकाले पनि यसको विकासले खेल र खेलाडीको भविष्य सुनिश्चित गर्न फुटबल को विकासमा समर्पित हुन आग्रह गरे । कार्यक्रममा एन्फाका केन्द्रीय सदस्य पंकजविक्रम नेम्वाङ, बसन्त बानियाँ, पूर्व नेपाली फुटबल का राष्ट्रिय कप्तान हरि खड्का लगायतले बोलेका थिए ।
