आइतबारे : १६ औ संस्करणको आइतबारे रनिङ ट्रफी खुल्ला फुटबल प्रतियोगिता अन्तर्गत आजको खेलमा आहाले सेभेन र खुदुनाबारी स्पोर्टिङ क्लब झापा क्वाटरफाइनल प्रवेश गरेका छन् । आज भएको उद्घाटन खेलमा आयोजक आइतबारे युवा क्लबलाई ५–२ गोल अन्तरले हराउँदै आहालेले अन्तिम ८ मा स्थान सुरक्षित गरेको हो । बिजेता टिमका लागी सुसन कार्की र असिम राईले समान २/२ र अनिश राईले १ गोल गरे । पराजित टिमका लागी प्रशान्त प्रधान र कृष्ण प्रधानले १/१ गोलको योगदान दिएका थिए ।
दोश्रो खेलमा भेनस एफसी सुन्दरपानीलाई ३–१ गोल अन्तरले हराउँदै खुदुनाबारी समेत अन्तिम ८ मा प्रवेश गरेको छ । खुदुनाबारीको जितमा चेतन घतानीले २ र विशाल खवासले १ गोलको योगदान दिए । भेनसका उमेश राईले सान्तवाना गोल फर्काए । प्रतियोगिता अन्तर्गत भोलि पहिलो खेलमा गोदक सेभेन र सिसा क्लासिक तिनघरे भिड्ने तथा दोस्रो खेलमा आइतबारे एफसि र राइजिङ युवा क्लब कुटिडाँडा बिच खेल हुनेछ।
आइतबारे युवा क्लबको आयोजनामा सुरु भएको प्रतियोगितामा झापा र इलामका गरी १६ टिमको सहभागीता रहेको छ । बिजेता टिमले ८० हजार १ सय ११ तथा उपबिजेताले ५० हजार १ सय ११ सहित शिल्ड, मेडल र प्रमाणपत्र प्राप्त गर्नेछ । भ्रमण बर्ष २०२० सफल पारौ तथा लागू औसध, चेलिबेटी बेचबिखन एचआइभी एडस बिरुद्दको हाम्रो आवाज भन्ने मुल नाराका साथ आयोजित प्रतियोगिताको फाइनल खेल माघ ११ गते हुनेछ । फाइनल खेलको दिन दात,हाडजोर्नी,सुगर प्रेसर लगाएत रोगको परिक्षण हुने आयोजकले जनाएको छ ।
आयोजक संस्थाका अध्यक्ष खड्ग प्रसाद दाहालको सभापतित्व तथा नगर प्रमुख रण बहादुर राइको प्रमुख आतिथ्यता रहेको उदघाटन कार्यक्रममा मेची अञ्चल आयुर्बेर्दिक औषधालयका प्रमुख तिर्थराज आचार्यको बिशिष्ट आतिथ्यता रहेको थियो।