इलाम । लामो समयदेखि अवरुद्ध मेची राजमार्गअन्तर्गत इलामको माइखोला–राजदुवाली सडकखण्ड भोलि (भदौ १५ गते) देखि सञ्चालनमा ल्याउने तयारी गरिएको छ। मौसमले साथ दिएमा सडक डिभिजन कार्यालय इलामले पहिलो चरणमा साना तथा हलुका सवारीसाधन सञ्चालनमा ल्याउने तयारी गरेको हो। लगातारको वर्षाका कारण सडक भासिएपछि गत असार २५ गतेदेखि माइखोला–राजदुवाली सडकखण्डमा यातायात पूर्ण रूपमा अवरुद्ध भएको थियो।
असार २९ गतेसम्म आइपुग्दा सडक थप भासिएपछि मोटरसाइकलसहित सबै प्रकारका सवारीसाधन सञ्चालनमा समेत पूर्ण रोक लगाइएको थियो। सडक बन्द भएपछि इलामसहित पाँचथर र ताप्लेजुङको झापा तथा तराई क्षेत्रसँगको नियमित यातायात सम्पर्क प्रभावित हुँदै आएको थियो। मुख्य राजमार्ग लामो समय अवरुद्ध हुँदा दैनिक उपभोग्य वस्तुको ढुवानी, बिरामीको आवतजावत, यात्रु तथा व्यवसायीसमेत प्रभावित भएका थिए।
करिब ५१ दिनदेखि बन्द रहेको सडक खुलाउन सडक डिभिजन कार्यालय इलामको टोली निरन्तर खटिएको छ। सडक डिभिजन कार्यालयका प्रमुखसहितको प्राविधिक टोलीले सडक मर्मत तथा सवारी सञ्चालनयोग्य बनाउने काम गरिरहेको जनाइएको छ। हाललाई सडकको अवस्था र जोखिमलाई ध्यानमा राख्दै साना तथा हलुका सवारीसाधन मात्र सञ्चालनमा ल्याउने तयारी गरिएको पुर्वेली टयाक्सी व्यवसायी संघका अध्यक्ष गृष्म सुब्बाले जानकारी दिए ।
माइखोला–राजदुवाली सडकखण्ड वर्षायाममा पटक–पटक भासिने समस्याबाट प्रभावित हुँदै आएको छ। यसपटक पनि लगातारको वर्षा र सडक भासिएपछि लामो समयसम्म राजमार्ग अवरुद्ध भएको हो। मौसम प्रतिकूल नभएमा भोलिदेखि हलुका सवारीसाधन सञ्चालनमा आएपछि लामो समयदेखि सडक अवरोधका कारण सास्ती खेपिरहेका यात्रु तथा स्थानीयवासीलाई केही राहत पुग्ने अपेक्षा गरिएको छ।
