नेकपा माओवादी केन्द्रका अध्यक्ष पुष्पकमल दाहालले आफूले शेरा दरबार प्रकरणको छानबिन गरौँ भनिसकेको भन्दै अब पालो अरूको रहेको बताएका छन्। शनिवार नुवाकोटमा पत्रकारसँग कुरा गर्दै अध्यक्ष दाहालले प्रधानमन्त्री केपी शर्मा ओलीतर्फ इङ्गित गर्दै यस्तो बताएका हुन्।
‘सदनमा उभिएर मैले प्रधानमन्त्री जी तुरुन्तै शेरा दरबार प्रकरणमा छानबिन सुरु गरिहाल्नुस् भनेको थिएँ। मैबाट सुरु गरियोस् पनि भनेको थिएँ,’ अध्यक्ष दाहालले भने, ‘छानबिन गर्न आँट हुने स्थिति भएन किनकि मेरो कुनै संलग्नता थिएन।’ शेरा दरबारमा आफ्नो संलग्नता नभएको दाबी गर्दै केही नभएकैले आफूले ‘मैबाट छानबिन गर्न सुरु गरियोस् भनेको’ बताए।
त्यस्तै भन्ने पालो अब अन्य शीर्ष नेताको रहेको दाहालले टिप्पणी गरे। ‘अब यसै गरी अरूले पनि भनेर देखाउन्। गिरिबन्धु मैबाट छानबिन गरौँ भनेर प्रधानमन्त्रीजीले भनुन् त,’ दाहालले भने। र, त्यसै गरी ‘अरू जग्गाको केसमा अरूले भनुन् त !’ भनेर दाहालले चुनौती दिए। नुवाकोटको शेरा दरबारको जग्गा हिनामिना प्रकरणमा अध्यक्ष दाहालको नाम जोडिदै आएको छ। तर उक्त प्रकरणमा आफ्नो संलग्नता नभएको उनले दाबी गर्दैआएका छन्।
