इलाम– इलाम जिल्ला अदालतले बालिका बलात्कारका दुई दोषीलाई १२ र आठ वर्षको कैद सजाय सुनाएको छ । जिल्ला न्यायाधीश केशवप्रसाद घिमिरेको इजलासले माई नगरपालिकाका ३२ वर्षे दुर्गाबहादुर भट्टराईलाई १२ र वर्ष कैद र पाँच लाख रुपैयाँ जरिमाना फैसला गरेको हो । १६ वर्षीया बालिकालाई जबर्जस्ती करणी गरेको आरोपमा थुनामा रहेका भट्टराईलाई दुई लाख रुपैयाँ पीडितका लागि भराउनुपर्ने पनि फैसलामा उल्लेख छ ।
गएको असार १६ गते ती बालिकालाई बलात्कार गरेको आरोपमा भट्टराईलाई प्रहरीले पक्राउ गरेको थियो । यस्तै, सूर्योदय नगरपालिकाका ५३ वर्षे धनमान भनिने मोहन राईलाई बालिकामाथि जबर्जस्ती करणी गरेकामा दोषी ठहर भएपछि आठ वर्ष कैद सजाय सुनाइएको छ । गत पुस ९ मा कक्षा ४ मा अध्ययनरत बालिकालाई जबर्जस्ती करणी गरेको आरोपमा उनी पक्राउ परी थुनामा थिए ।
राईलाई कैदसहित तीन लाख रुपैयाँ जरिमाना र पीडितका नाममा दुई लाख रुपैयाँ भराउन भनिएको अदालतले जनाएको छ ।
