विराटनगर : कोशीका पूर्वमुख्यमन्त्री केदार कार्कीले आज दिउँसोदेखि निषेधित क्षेत्र घोषणा गरेको कोशी प्रदेशसभासामु आमरण अनशन शुरु गरेका छन्। उनी अनशन बस्ने घोषणा गरेलगत्तै जिल्ला प्रशासन कार्यालय मोरङले प्रदेशसभा आसपासका क्षेत्रलाई निषेधित क्षेत्र घोषणा गरेको थियो। विराटनगरलाई केन्द्रबिन्दु बनाई हुनसक्ने अनशन लगायत विरोधका कार्यक्रम गर्न नपाइने भन्दै ३ बजेदेखि निषेधित क्षेत्र तोकिएको थियो।
मंगलवार दिउँसो प्रशासनले विराटनगरका ५ वटा स्थानमा निषेधित क्षेत्र तोकेको छ। प्रदेशसभा पूर्वमा देवकोटा चोकदेखि पश्चिममा कोशी अस्पतालको चोक, मुख्यमन्त्री तथा मन्त्रिपरिषद्को कार्यालय, रोडशेष चोकदेखि दक्षिण जतुवा चोक क्षेत्र, मुख्यमन्त्री निवास वरिपरि र जिल्ला प्रशासन कार्यालय मोरङदेखि डाँफे चोकदेखि पूर्वसम्म निषेधित क्षेत्र तोकिएको सूचनामार्फत जानकारी गराएको थियो।
कार्कीले मुख्यमन्त्री हिक्मतकुमार कार्कीसमक्ष विभिन्न ९ वटा माग राख्दै ४८ घण्टाको अल्टिमेटम समेत दिएका थिए। आफूले उठाएको एजेण्डा जनताको एजेण्डा भएकाले सबैले सहयोग गर्ने पूर्वमुख्यमन्त्री कार्कीको दाबी छ।
