फिक्कल । उपाधिको दावेदार इलाम नगरपालिकालाई फराकिलो गोल अन्तरले हराउँदै माई नगरपालिका प्रथम देउमाई कपको फाइनलमा प्रवेश गरेको छ । मंगलबारेको छात्रावास खेलमैदानमा जारी प्रतियोगितामा माईले इलाम माथि ३–० गोल अन्तरको जित निकालेको हो । माईको जितमा विशाल तामाङ, पवन राई र सुवासचन्द्र नेम्वाङले गोल गरे ।
पहिलो हाफ गोलरहित बराबरीमा सकिएको खेलमा माईले दोश्रो हाफमा स्कोर निकालेको हो । दोश्रो हाफको छैटौ मिनेटमा विशाल तामाङले डिबक्सबाट बार च्याप्दै गरेको प्रहार गोलमा परिणत भएको थियो । १७ औ मिनेटमा इलामका गोलरक्षक विवेक मगरको गल्तीको फाइदा उठाउँदै पवन राईले अग्रता दोब्बर बनाए ।
खेलमैदानको मध्यभागबाट हेडर मार्फत आएको पासलाई गोलरक्षक मगरले क्लियर गर्ने क्रममा डिफ्लेक्ट भएपछि पाएको अवसरलाई राईले जाली चुमाए । इन्जुरी समयमा सब्स्टिच्युटको रुपमा मैदान प्रवेश गरेका नेम्वाङले सुजन नेम्वाङको क्रस पासमा गोल गरे । खेलको म्यान अफ दि म्याच माईका विकाश बराल घोषित भए ।
विहिबार दोश्रो सेमीफाइनल खेलमा सन्दकपुर गाउँपालिका र चुलाचुली गाउँपालिका भिड्नेछन् । सेमीफाइनल प्रवेशका लागि चुलाचुलीले फाकफोकथुम गाउँपालिका र सन्दकपुरले रोङ गाउँपालिकालाई हराएका थिए ।
