नयाँबजार । माईजोगमाई गाउँपालिका अध्यक्ष कपमा फाकफोकथुम गाउँपालिका सेमीफाइनल प्रवेश गरेको छ । तेश्रो क्वाटरफाइनल खेलमा माई नगरपालिकालाई टाइब्रेकरमा हराउँदै फाकफोकथुमले अन्तिम ४ मा स्थान सुरक्षित गरेको हो ।
निर्धारित समयमा दुवै टोलीबाट १—१ गोल भएपछि निर्णयको लागि टाइब्रेकर रोजिएको थियो । खेलको सुरुवाती अग्रता माईले लिएको थियो । कप्तान विशाल खवासले ३१ औ मिनेटमा गोल गरेका थिए । दोश्रो हाफमा सन्दीप लिम्बुले खेल बराबरीमा ल्याए ।
टाइब्रेकरमा २—१ गोल अन्तरको जित निकाल्दै फाकफोकथुम सेमीफाइनल पुगेको हो । फाइनल प्रवेशका लागि फाकफोकथुमले बैशाख १६ गते माईजोगमाईको सामना गर्नेछ । माईजोगमाईले सन्दकपुर गाउँपालिकालाई हराएर सेमीफाइनल पुगेको हो ।
अन्तिम क्वाटरफाइनल खेलमा देउमाई नगरपालिका र माङसेबुङ गाउँपालिका भिड्नेछन् । देउमाईले प्रि—क्वाटरफाइनल खेलमा रोङ गाउँपालिकालाई हराएको थियो ।
