बिर्तामोड। जर्ज प्रिन्स कार्कीको गोलमा नेपाल पुलिस क्लबलाई हराउँदै अर्को विभागिय टोली त्रिभुवन आर्मी क्लब झापामा जारी तेस्रो रमपम झापा गोल्डकपको सेमिफाइनलमा पुगेको छ ।हारसंगै पुलिसले आर्मीसंग हारको बदला लिने अबसर गुमाएको छ । यसअघि गत फाल्गुन १२ गते सम्पन्न तेश्रो हेटौडा गोल्डकप फुटबलको उपाधीका लागी यि दुई टोलीबिच भेट भएको थियो । पुलिसमाथी ट्राइवेकरमा ४–३ को जित निकाल्दै आर्मीले उपाधी जितेको थियो ।
बिर्तामोडको डोमालाल राजबंशी रंगशालामा बुधबार भएको क्वार्टरफाइनलमा जर्ज प्रिन्सले ४३ औं मिनेटमा गरेको गोल नै खेलको निर्णायक बनेको थियो ।
पुलिसका रक्षक अजित भण्डारीले आर्मीका नवयुग श्रेष्ठलाई पेनाल्टी बक्स नजिकै फाउल हानेपछि प्राप्त फ्रिकिकमा जर्ज प्रिन्सले गोल गरेका थिए । अन्तिम चारको प्रतिस्पर्धामा आर्मी ले साविक विजेता लक्ष्मी हुन्डाई मनाङ मस्र्याङदी क्लबको सामना गर्नेछ । खेल अवधिभर पुलीसले आर्मीलाई दबावमा राखेको थियो । यद्यपी आक्रमण फितलो बन्दा पुलिसले गोलको खाता खोल्न सकेन ।
खेलको १४ औं मिनेटमा आर्मीका कप्तान भरत खवासले गरेको हेड पुलिसका गोलकिपर शत्रुघन चौधरीले पञ्च गरेर फर्काए । त्यस्तै खेलको १८औँ मिनेटमा पुलिसका दिनेश राजवंशीले प्mिलक गरेको बल फितलो हुँदा आर्मीका गोलकिपर विकेश कुथूले सजिलै रोके । २७औँ मिनेटमा आर्मीका निरकुमार राईले प्रहार पोष्टको केही माथिबाट बाहिरिएको थियो ।
३०औँ मिनेटमा पुलिसका रेजिन सुब्बाको हेड पनि बाहिरिएको थियो । ५९औँ मिनेटमा पुलिसले पेनाल्टी बक्स बाहिरिबाट पाएको फ्रिकिक आर्मीका रक्षकले गोललाइनबाट बचाएका थिए । ६५औँ मिनेटमा आर्मीका भरत पासमा जर्ज प्रिन्सले हेड गरेको बल पुलिसका गोलकिपर शत्रुघनले रोके । ८२औँ मिनेटमा पुलिसका अजित भण्डारीले गरेको हेड बल विकेशले जोगाए ।
लगत्तै पुलिसको अर्को प्रहार पनि विकेशले बचाउँदा पुलिसले बराबरी गर्ने अवसर गुमाएको थियो । खेलको अतिरिक्त समयमा पदम तामाङले पाएको अवसर गुमाउँदा आर्मी गोलअन्तर बढाउन चुकेको थियो ।म्यान अफ द म्याच आर्मीका जर्ज प्रिन्सले २५ हजार रुपैंयाँ प्राप्त गरे । पुरस्कार शैक्षिक परामर्शदाता संस्था ओली एण्ड एसोसियट्सले उपलब्ध गराएको हो ।
खेलपछि पोष्ट म्याच कन्फ्रेन्समा आर्मीका प्रशिक्षक चुनबहादुर थापाले आफ्ना केही खेलाडी घाइते भएका कारण अपेक्षित खेल पस्कन नसकेको बताए । ‘खेलमा जित निकाल्नु महत्वपुर्ण हुन्छ’, उनले भने, ‘पुलिससँगको जित हाम्रो लागि सहज हो । ‘ पुलिसका प्रशिक्षक अनन्त थापाले नयाँ टोली बनाउदै गएको हुनाले आजको प्रदर्शनमा अनुभवको कमी देखिएको बताए । खेलाडीले पाएको अवसर सदुपयोग गर्न नसक्दा हार ब्यहोर्नु परेको उनको भनाइ थियो ।
यसैबीच, गोल्डकपका संस्थापक सदस्य फुर्वा लामा र अन्तर्राष्ट्रिय झापाली समाज अष्ट्रलियाका अध्यक्ष दिनेश पोखरेलको पहलमा गोल्डकपको दोस्रो पुरस्कार प्रायोजन गरिने भएको छ । गोल्डकप विजेताले नगद १२ लाख ५० हजार र उपविजेताले छ लाख पाउनेछ ।
झापा गोल्ड कपमा शुक्रबारको खेल : रमपम झापा ११ विरुद्ध थ्री स्टार क्लब
