इलाम । इलाम नगरपालिका ९ निवासी गोविन्द मैनालीले १५ लाख मुल्य पर्ने जग्गा खानेपानी उपभोक्ता समितिलाई दान गरेका छन् । पिउने पानीको अभावमा असहज जीवन विताइरहेका इनपा ९ भञ्ज्याङमुनिका बस्तीमा पिउने पानीको व्यवस्थापन गर्न उनले जग्गा दान गरेका हुन् ।
स्थानीय ढोडेनी भञ्ज्याङ खानेपानी तथा सरसफाई उपभोक्ता समितिलाई ३ आना जग्गा दान गरेको मैनालीले बताए । मालपोत कार्यालय परिसरमा भेटिएका समितिका सल्लाहकार किशोर कार्कीले १५ लाख मुल्य बराबरको जग्गा दान गरेको पुष्टि गरे । विहीबार नै समितिको नाममा सो जग्गा आइसकेको छ ।
आफ्ना दिवंगत मातापिता चन्द्रकला र जयप्रसाद मैनालीको स्मृतिमा सो पुण्य काम गरिएको गोविन्दले बताए । सो जग्गामा समितिले पिउनेपानीको ट्याङ्की निर्माण गर्ने समितिका अध्यक्ष होमबहादुर गौतमले बताए । सो पिउने पानी आयोजना सम्पन्न भइसक्दा सो क्षेत्रका अन्दाजी ४ सय जना लाभान्वित हुनेछन् ।
मैनाली उनै ब्यक्ति हुन् जसले विनाकसुर जापानको जेलमा १४ बर्ष विताएका थिए । १४ बर्षपछि जापानको उच्च अदालतले मैनालीलाई बेकसुर सावित गरि क्षतिपूर्तिको रकम भराएको थियो ।
