इलाम । ग्रामीण क्षेत्रमा विस्तार गरिएको विद्युत प्रारण लाइनका पोलहरु मक्किएर ढलेपनि परिवर्तन नगर्दा इलाममा धराप रुपमा परिणत भएका छन् । हावाहुरी,दैविप्रकोपले भाँचिएका र मक्किएका पोल नफेर्दा गाउँघर उज्यालो पार्ने विद्युत प्रशारण लाइन धराप भएका हुन् ।
विद्युतको पोल फेर्न सूर्योदय नगरपालिका ३ की टिका मगरले विद्युत प्राधिकरणमा आग्रह गरेको बर्षौ भइसक्यो । चार वर्ष अघि हावाले लर्काएको काठको पोल फेर्नुत के फेदनै भाँचिएपछि आँफैले टेको लगाउनुपर्यो । टेको लगाएर अड्याएको विद्युतिय पोल ढलेर करेन्ट लाग्ने त्रासले टिकालाई अहिले रातभर निन्द्रा लाग्दैन ।विद्युतको पोलबाट छुट्टिएर लत्रिएको तारले फिक्कल गहिरिगाउँका देबेन्द्र गौतमलाई तीन पटक भेटिसक्यो । मर्मतका लागि तीन महिना अघिदेखि भनेपनि प्राधिकरणले टेरेको छैन ।
गाउँघर उज्यालो पार्न इलाममा गाडिएका विद्युतिय पोल मर्मत नहुँदाको समस्या हो । काठका पोलको आयु सकिएपनि परिर्वतन नहुँदा उज्यालो पु¥याउने विद्युत प्रशारण लाइन इलामे जनताका लागि धराप भएका हुन् ।
विद्युत प्राधिकरण, जिविस, गाविस र उपभोक्ताले विद्युत विस्तार गरेपछि पोल परिवर्तनका लागि चासो नदिनाले इलामका ७ हजार बढी विद्युतिय पोल धरापका रुपमा छन् । त्यसमध्ये इलाम सदरमुकाममा मात्रै ८ सय फर्नुपर्ने  नेपाल विद्युत प्राधिकरण इलाम शाखाका प्रमुख सिताराम सिग्देल बताए ।
हावाहुरी, दैवि प्रकोप र आयु सकिएका पोल परिवर्तन गर्ने बजेट नहुँदा यस्तो समस्या आएको हो । स्थानीय निकाय र उपभोक्ताले विद्युत विस्तार गर्दा गाडिएका पोल तथा तारको गुणस्तर जाँच नगरिँदा पनि विद्युत लाइन धरापमा परिणत भएका हुन् ।
मक्किएका र भाँचिएका पोल फेर्नका लागि फलामे पोलको माग गरेपनि थोरैमात्रै प्राप्त हुनाले समस्या बढेर गाएको विद्युत प्राधिकरणको भनाइ छ । गाउँघर उज्यालोदे बनाउन गाडिउको विद्युतिय पोल नफेरिँदा पासो बनेकाले सरकारी निकाय गम्भिर भएर तत्काल पोल फेर्न काममा लाग्नुपर्ने  देखिन्छ ।